Leiðir til byggðafestu

Íbúum á Vesturlandi, Vestfjörðum og Norðurlandi vestra býðst fjölbreytt fræðsla haust og vetur 2024-2025 á vegum Leiða til byggðafestu. Hér að neðan birtast upplýsingar um námskeið og erindi sem í boði eru og er fólk beðið að skrá sig svo gera megi viðeigandi ráðstafanir. Námskeið og viðburðir á vegum verkefnisins eru þátttakendum að kostnaðarlausu nema annað sé tekið fram. 

Námskeið á vegum Leiða til byggðafestu

Vönduð og hagnýt vefnámskeið fyrir smáframleiðendur matvæla, sem hægt er að taka frá 15. október 2024 til 15. febrúar 2025. Námskeiðin eru hönnuð af Matís sem er stærsta rannsóknafyrirtæki landsins á sviði matvælarannsókna og starfar með stórum og smáum fyrirtækjum í matvælaiðnaði. Starfsfólk Matís hefur áralanga reynslu af rannsóknum á matvælum og leggur ríka áherslu á að miðla þessari þekkingu til matvælaiðnaðar á Íslandi. Matís hefur gefið út upplýsingar fyrir nýja matvælaframleiðendur sem fela m.a. í sér leiðbeiningar til að hefja framleiðslu, dreifingu og sölu. 

• Leyfimál, gæðahandbók, innra eftirlit og stofnun fyrirtækja 
• Örverur á kjöti 
• Slátrun og kjötmat 
• Söltun og reyking 
• Umbúðamerkingar matvæla og pökkun 
• Hráverkun og pylsugerð 
• Sögun, úrbeining og marinering

Skráning á námskeið hér 

Einnig er boðið upp á vönduð og hagnýt námskeið fyrir fyrirtæki og einstaklinga:

1.febrúar 2025 í Grunnskólanum á Reykhólum - Sögufylgjunámskeið með Inga Hans Jónssyni og Ragnhildi Sigurðardóttur

Bæði Ingi Hans og Ragnhildur hafa langa reynslu í frásögn og miðlun sagna. Á Snæfellsnesi hefur verið stofnað félag um Sögufylgjur. Það eru gríðarleg tækifæri í sögufylgd, þessi grein þarf litla sem enga yfirbyggingu en hefur mikil tekjutækifæri og alveg tilvalin búbót upp til sveita. Þau fara yfir hugmyndafræðina og taka dæmisögu af Snæfellsnesi og almennt yfir sagnamiðlun. Námskeiðið er kennt á bókasafni Grunnskólans að Reykhólum, hefst kl. 13:00 og stendur til kl. 16:00. Aðgangur ókeypis en skráningar þörf.

Skráning á námskeið hér  

 3. nóvember á Hótel Laugarbakka - Leiðtogafærni í eigin lífi með Jóni Halldórssyni (Lokið)
Leiðtoganámskeið fyrir íbúa á Vesturlandi, Vestfjörðum og Norðurlandi vestra á Hótel Laugarbakka. Námskeiðið er leitt af Jóni Halldórssyni hjá mennta- og þjálfunarfyrirtækinu KVAN og er það að kostnaðarlausu fyrir öll áhugasöm sem búsett eru á áðurnefndum svæðum.

Vilt þú finna kraftinn til þess að taka næsta skref? Vilt þú fá aukið sjálfstraust til þess að hámarka árangur í starfi og/eða einkalífi? Vilt þú verða markmiðadrifin(n) og ná aukinni einbeitingu í verkefnum en á sama tíma ná að njóta augnabliksins? Hvort sem þú vilt styrkja þig í persónulega lífinu eða annarsstaðar, þá ættu allir að geta grætt eitthvað á námskeiði KVAN. Nánar hér

Skráning á námskeið hér

24. október í Félagsheimilinu Tjarnarlundi - Frá hugmynd að rekstri með Huldu Brynjólfsdóttur (Lokið) 

Hulda er eigandi ullarvinnslunar Uppspuna. Hulda er búfræðingur og kennari. Alin upp í sveit og býr nú að Lækjartúni í Rangárvallasýslu. Þar reka hún og maðurinn hennar blandað bú, þar sem sauðfé og nautgripir leika lykilhlutverk. Ullarvinnsluna Uppspuna opnuðu þau árið 2017 með hinum störfum á bænum. Hún ætlar að fjalla um það að fá hugmynd og hvaða skref þarf að taka til að byrja. Hvað það er sem þarf til að stofna fyrirtæki, byggja það upp og halda því gangandi. Hulda ætlar að fara yfir þætti sem skipta máli frá því að hugmynd fæðist og yfir í starfandi fyrirtæki.

Skráning á námskeið hér

Um Leiðir til byggðafestu 

Leiðir til byggðafestu er verkefni sem snýr að eflingu nýsköpunar á sauðfjárræktarsvæðum á Íslandi. Fjórðungssamband Vestfirðinga (FV), Samtök sveitarfélaga á Vesturlandi (SSV) og Samtök sveitarfélaga á Norðurlandi vestra (SSNV) standa sameiginlega að verkefninu. Það er unnið með styrk frá innviðaráðuneytinu til að efla byggð á því landsvæði sem mest á undir sauðfjárrækt. Þar er litið til Dalabyggðar, Reykhólahrepps, Strandabyggðar, Kaldrananeshrepps, Árneshrepps og Húnaþings vestra.

Í sveitarfélögunum sex er talin mikil þörf á að fjölga nýsköpunarverkefnum til að treysta byggðafestu á lögbýlum, auk þess að veita frumkvöðlum á svæðinu stuðning og hvatningu. Með verkefninu er hvatt til nýsköpunar og verðmætasköpunar. Áherslan er fyrst og fremst á lögbýli á strjálbýlum svæðum.

Samið var við fyrirtækið Eigið fé ehf um verkefnisstjórn. Fyrsta skrefið við framkvæmd verkefnisins var tækifæragreining, annað skrefið stefnumótun og þriðja skrefið fræðsla og tengslamyndun til að hrinda tækifærum í framkvæmd.

Tækifæragreiningin er fullunnin og hefur verið birt í skýrslunni Leiðir til byggðafestu