Græn skref

Sveitarfélögum á Vestfjörðum býðst að taka þátt í verkefninu Græn skref Vestfjarðastofu, sem byggir á Grænum skrefum í ríkisrekstri. Verkefnið miðar að því að draga úr neikvæðum umhverfisáhrifum af starfsemi sveitarfélaganna, að draga úr losun og að innleiða þekkingu á loftslagsbókhaldi og aðgerðaáætlanagerð.

Með þátttöku í Grænum skrefum fá sveitarfélögin verkfæri í formi gátlista; lista yfir aðgerðir sem hægt er að innleiða á vinnustöðunum til að draga úr neikvæðum umhverfisáhrifum. Græn skref er árangursrík leið fyrir stofnanir og fyrirtæki að vinna markvisst að umhverfismálum. Skrefin eru alls fimm og með 20-40 aðgerðum sem sveitarfélög þurfa að innleiða í rekstur sinn. Veitt er viðurkenning fyrir hvert skref sem stofnanir ljúka við.

Aðgerðirnar eru bæði stórar og smáar í sniðum, dæmi um aðgerðir er að koma á skýru flokkunarkerfi fyrir úrgang, draga úr magni úrgangs með því að leita leiða til að kaupa notað frekar en nýtt og gera sitt besta til að koma því sem ekki nýtist lengur á vinnustaðnum aftur inn í hringrásarhagkerfið. Einnig er mikið lagt upp úr því að ýta undir virka ferðamáta starfsfólks, t.d. með gerð samgöngusáttmála og að séð til þess að góð aðstaða sé til staðar fyrir hjólandi. Þetta eru eingöngu fá dæmi um þær aðgerðir sem Grænu skrefin fela í sér – en fyrir áhugasöm má nálgast listana hér og skoða þá.

Græn skref Vestfjarðastofu er ákveðin tilraun þar sem byrjað er á skrifstofustarfsemi sveitarfélaganna, en lagt er upp með að fleiri vinnustaðir sveitarfélaganna geti tekið þátt þegar fram líða stundir. Með því að byrja á skrifstofustarfseminni byggist upp þekking innanhúss og lykilstarfsfólk skrifstofanna getur í framhaldinu komið þekkingunni á framfæri við aðra vinnustaði sveitarfélaganna.

Sveitarfélögin innleiða skrefin á sínum hraða, en þau sveitarfélög sem eru þátttakendur munu fá aðstoð frá umhverfis- og loftslagsráðgjafa Vestfjarðastofu við að uppfylla lögbundnar skyldur sveitarfélaga í loftslagsmálum. Samkvæmt loftslagslögum skulu sveitarfélög setja sér loftslagsstefnu með samdráttarmarkmiðum ásamt aðgerðaáætlun svo þeim markmiðum verði náð. Til þess að hægt sé að gera það þarf að halda utan um grænt bókhald sveitarfélaga, en þátttaka í rafrænu grænu bókhaldi Klappa sem Vestfjarðastofa hefur keypt inn er forsenda fyrir þátttöku í grænu skrefunum.