Í dag voru undirritaðir samningar um sóknaráætlanir í átta landshlutum við hátíðlega athöfn í Þjóðmenningarhúsinu. Með samningunum er brotið í blað í sögu samskipta landshlutanna við Stjórnarráðið að því er varðar úthlutun opinberra fjármuna til einstakra verkefna um land allt.
Með samningunum er staðfest nýtt verklag sem einfaldar samskipti milli ríkisvaldsins og samtaka sveitarfélaga, gerir þau skilvirkari og stuðlar að bættri nýtingu fjármuna. Markmiðið er að færa aukin völd og aukna ábyrgð til landshlutanna við forgangsröðun og skiptingu opinbers fjár sem rennur til verkefna á sviði byggða- og samfélagsþróunar.
Ríkisstjórnin tryggir á þessu ári 400 m.kr. til verkefnanna sem samþykkt hafa verið, en þau eru alls 73 í átta landshlutum. Mótframlag frá landshlutunum sjálfum nemur um 220 m.kr.
Katrín Júlíusdóttir, fjármála- og efnahagráðherra, undirritaði samningana fyrir hönd ríkisstjórnarinnar. Öll ráðuneytin hafa komið að málinu á ýmsum stigum þess. Svonefnt stýrinet er skipað fulltrúum allra ráðuneytanna auk fulltrúa Sambands íslenskra sveitarfélaga og Byggðastofnunar. Annast stýrinetið samninga, leiðsögn við áætlanagerðina og önnur samskipti við landshlutasamtökin þvert á öll ráðuneyti. Fyrir hönd landshlutasamtaka sveitarfélaga skrifa formenn hver undir sinn samning. Albertína Elíasdóttir undirritaði samning um Sóknaráætlun Vestfjarða fyrir hönd Fjórðungssambandsins.
Sóknaráætlanirnar urðu til innan samráðsvettvanga í hverjum landshluta. Landshlutasamtökin leiddu vinnuna en fulltrúar atvinnulífs, sveitarstjórna, stofnana og samfélags tóku þátt. Áætlað er að allt að 800 manns hafi komið að gerð þeirra.