Kómedíuleikhúsið í samstarfi við Þröst Jóhannesson, tónlistarmann, frumsýnir ljóðaleikinn Ég bið að heilsa miðvikudaginn 7. nóvember á veitingastaðnum Við Pollinn á Ísafirði. Leikurinn er settur upp í tilefni af 200 ára fæðingarafmæli Jónasar Hallgrímssonar sem er 16. nóvember næstkomandi. Jónas eða Listaskáldið góða eins og hann er nefndur er eitt af ástsælustu skáldum þjóðarinnar. Í þessum leik verða flutt ljóð skáldsins í tali og tónum. Meðal ljóða í leiknum eru Móðurást, Gunnarshólmi, Vísur Íslendinga, Ferðalok og síðast en ekki síst Ég bið að heilsa.
Leikarinn Elfar Logi Hannesson flytur ljóðin í leik og tali og Þröstur Jóhannesson flytur frumsamin lög við ljóð skáldsins. Frumsýning er eins og áður segir miðvikudaginn 7. nóvember á veitingastaðnum Við Pollinn á Ísafirði og hefst kl.20.00. Boðið verður upp á tvennskonar miðaverð. Mat og leiksýningu á krónur 2.900.- og hefst maturinn kl.19.00. Einnig er hægt að kaupa bara miða á sýninguna og kostar hann aðeins 1.500.-krónur. Miðapantanir eru í síma: 456-3360. Önnur sýning á ljóðaleiknum Ég bið að heilsa er svo viku síðar eða miðvikudaginn 14. nóvember kl. 20.00.