Mánudaginn 17. mars var haldin skapandi vinnustofa á Vestfjarðastofu til að undirbúa sýninguna Gullkistan Vestfirðir. Vinnustofan var opin öllum sem eiga aðild að Sóknarhópi Vestfjarða og mættu um 40 manns til hennar. Gullkistan Vestfirðir er Vestfjarðasýning sem verður haldin 6. september 2025 í íþróttahúsinu á Torfnesi. Á sýningunni gefst vestfirskum fyrirtækjum og annarri starfsemi á svæðinu tækifæri til að kynna sig fyrir Vestfirðingum og gestum.
Vinnustofan hófst á sameiginlegum hádegisverði þar sem Þorgerður Katrín Gunnarsdóttir, utanríkisráðherra og María Rut Kristinsdóttir, þingkona Norðvesturkjördæmis heilsuðu upp á gesti. Síðan leiddi Bragi Valdimar Skúlason vinnu þar sem þátttakendur komu fram með hugmyndir um hvernig þeir vildu helst sjá sýninguna og viðburði henni tengda.
Í fyrstu var farið yfir markmið, hver ætti að vera kjarni sýningarinnar og rætt hvaða sögu við viljum segja. Niðurstaðan var í stuttu máli að kynna nýsköpun, mannauð, þekkingu, menningu og okkar samheldna samfélag. Vildi hópurinn gjarnan að teflt yrði þar fram hversu framarlega við stöndum í nýsköpun á mörgum sviðum – og höfum lengi gert. Einnig að sýningin bæri merki þess hversu mikill kraftur og bjartsýni ríkir á Vestfjörðum – og hvernig íbúum hefur lánast að bæði vernda og nýta náttúruna.
Á sýningunni verður kynnt hið öfluga atvinnulíf sem þrífst á Vestfjörðum, en ekki síður hlutir eins og tækifæri í menntun og einstök menning. Þá á hún að fanga þann uppgang sem einkennir vestfirskt samfélag um þessar mundir og hvað það er gott að búa á Vestfjörðum. Gullkistunni Vestfirðir er ætlað að sameina Vestfirðinga og kynna það sem er að gerast á Vestfjörðum.
Í kjölfarið á sýningunni á Ísafirði verða svo viðburðir á öllum svæðum þar sem fyrirtækin bjóða heim undir merkjum Gullkistan Vestfirðir. Með þessu viljum við auka samtakamátt og kynnast betur. Nánari upplýsingar um þátttöku í sýningunni og tengdum viðburðum verða sendar út síðar.
Fyrir frekari upplýsingar má hafa samband við gudrunanna@vestfirdir.is eða solvi@vestfirdir.is