Vörumessa Menntaskólans á Ísafirði verður haldin á morgun 3. apríl kl. 13:30 – 17:00 í húsakynnum Vestfjarðastofu á Ísafirði. Vörumessan er kynning á verkefnum nemenda sem þau hafa unnið í áfanganum Hugmyndir og nýsköpun og er hún vettvangur fyrir unga frumkvöðla, fyrirtæki og samfélagið að þróa nýjar hugmyndir og lausnir á Vestfjörðum. Vörumessan er styrkt af Uppbyggingasjóði Vestfjarða og eru öll velkomin.
Í áfanganum er áhersla lögð á samstarf við fyrirtæki/ráðgjafa á svæðinu og að nemendur vinni sjálfstætt að því að þróa nýsköpunarlausn. Verkefnið eykur færni þeirra til nýsköpunar, atvinnuþátttöku og atvinnusköpunar og undirbýr nemendur þannig fyrir framtíðina. Nemendur kynna frumgerðir og verða með vörur til sölu.
Dómnefnd verður að störfum og á vörumessunni verða veittar verða viðurkenningar í eftirfarandi flokkum:
Áhugaverðasti básinn – hönnun/útlit, uppstilling afurðar, framkoma nemenda
Bjartasta vonin – hvaða hugmynd er líklegust til að geta haldið áfram og þróast á svæðinu, hvatning til að halda áfram með verkefnið.
Grænasta hugmyndin – umhverfisáhrif, endurvinnsla og hagsýni í nýtingu efna.