Emil Kohlmayr kemur í heimsókn í Vesturbyggð og leiðir grunnskólabörn inn í ævintýraheim sviðslista í fimm vinnustofum í grunnskólum Vesturbyggðar.
Tilgangur vinnustofanna er að gefa börnunum tækifæri til að kynnast sviðslistum undir handleiðslu listamanns i í fremstu röð. Emil Kohlmayer er söngvari, leikari og kvikmyndagerðarmaður frá Vín og sérhæfir sig í söngleikjum. Unnið verður með sviðsframkomu, beitingu raddarinnar og að draga fram leikræna tjáningu. Alejandra P. de Avila, kennari við Tónlistarskóla Vesturbyggðar, á frumkvæði að komu listamannsins og verður honum til aðstoðar í vinnustofunum.
Afrakstur vinnustofanna mun kristallast í söng og leiklistaratriðum á árshátíðum grunnskólabarnanna sem haldnar eru 10. april í hverjum skóla.
Verkefnið er samstarf Tónlistarskóla Vesturbyggðar við Patreksskóla, Bíldudalsskóla og Tálknafjarðarskóla.
Styrktaraðilar verkefnisins eru barnamenningarhátíðin Púkinn, Lionsklúbbur Patreksfjarðar, Oddi hf og Arnarlax.