Stjórn Fjórðungssambands Vestfirðinga gagnrýnir harðlega þá stöðu sem er í fjarskiptamálum Vestfirðinga og sýndi sig vel í dag hversu viðkvæmt það er, þegar víðtæk bilun kom upp í búnaði Mílu og farsímakerfi Símans. Vegna þessarar bilunar er stór hluti Vestfjarða sambandslaus við umheiminn í margar klukkustundir og ljóst að alvarlegt ástand hefur skapast þar sem ekki er hægt að hringja í lögreglu eða aðra viðbragðsaðila. 

Fjórðungssamband Vestfirðinga og Ferðaþjónusta Vestfjarða ehf hafa samið um akstur á sérleyfinu  Patreksfjörður- Brjánslækur- Ísafjörður. Fyrsta áætlunarferð verður ekin mánudaginn 25. ágúst n.k.  Leiðin verður tvískipt, annars vegar milli Patreksfjarðar og Brjánslækjar, hins vegar milli Ísafjarðar og Brjánslækjar. Áætlað er að ferðir milli Ísafjarðar og Brjánslækjar verði í boði þrisvar í viku, mánudaga, miðvikudaga og föstudaga til 15 september en eftir það verður fjöldi ferða endurskoðaður. Áætlað er að ferðir milli Patreksfjarðar og Brjánslækjar verði daglega allt árið. Tímasetningar taka mið af áætlun Baldurs yfir Breiðafjörð.

Ragnheiður Elín Árnadóttir hefur verið að ferð um Vestfirði síðustu daga og hefur hún heimsótt, fyrirtæki, stofnanir og sveitarfélög á svæðinu. Í gær fundaði ráðherra með Markaðsstofu Vestfjarða þar sem farið var yfir helstu málefni tengd ferðaþjónustunni. Var á þeim fundi meðal annars komið inn á nauðsyn þess að traustir innviðir séu til staðar vegna aukins ferðamannastraums, sem og mikilvægi þess að beina ferðamönnum á minna heimsótt svæði.

Fjórðungssamband Vestfirðinga og Hópferðamiðstöð Vestfjarða ehf hafa samið um akstur á sérleyfinu Ísafjörður-Hólmavík-Ísafjörður. Fyrsta áætlunarferð verður ekin á föstudag 1. ágúst n.k. en síðan verður ekið á miðvikudögum og sunnudögum til 14. september n.k.. Eftir 14. september verður ekið á föstudögum og sunnudögum fram á vor 2015.  Ekið verður í takt við áætlun Strætó bs samkvæmt leið 59 til Hólmavíkur frá Borgarnesi (Reykjavík

Menningarráð Vestfjarða hefur nú lokið við að fara yfir umsóknir um styrki vegna ársins 2014 og stjórn Fjórðungssambands Vestfjarða staðfest tillögu ráðsins um úthlutun. Að þessu sinni voru samtals 35,2 milljónir til úthlutunar til margvíslegra menningarverkefna og uppbyggingar víða um Vestfirði. Umsóknir voru fjölbreyttar og mörg verkefni afar áhugaverð. Menningarráð vill óska styrkhöfum til hamingju með framlögin og umsækjendum öllum góðs gengis við vinnu að sínum verkefnum. Listi um framlög er birtur hér að neðan.

Atvinnuþróunarfélag Vestfjarða (Atvest) hefur nú birt niðurstöður viðhorfskönnunar sem tekin var á meðal íbúa á Vestfjörðum síðla árs 2013. Könnunin var unnin fyrir Fjórðungssamband Vestfirðinga með tilstyrk Sóknaráætlunar landshluta. Almennt er niðurstaða könnunarinnar að íbúar á Vestfjörðum hafa jákvætt viðhorf til sinna samfélaga, náttúru og atvinnulífs, en eru ósáttir við hæga uppbyggingu innviða. Ætlun er að gera sambærilegar kannanir með reglubundnum hætti sem lið í eftirfylgni með byggðaþróun á Vestfjörðum.

Stjórn Fjórðungssambands Vestfirðinga kom saman til fundar 15.júli s.l..Á fundinum var bókuð harðorð ályktun gegn nýrri reglugerð heilbrigðisrherra varðandi sameiningu heilbrigðisstofnana.

Einhver brögð voru á því að tölvupóstur skilaði sér ekki samtímis til allra aðila varðandi verðkönnun á almeningssamgöngum og hafa aðilar því óskað eftir fresti að þessum sökum. FV ætlar að verða við þessum óskum og gefa frest til mánudags 21. júlí kl 10.00. Þess er vænst að aukinn frestur gefi aðilum einnig tök á því að  hafa til reiðu öll þau gögn sem óskað er að fylgi svari við verðkönnun. Það flýtir allri vinnu við úrvinnslu málsins og samningar náist fyrir þann 25. júlí n.k..

Fjórðungssamband Vestfirðinga leita nú til aðila með fólksflutningaleyfi og með heimilsfestu á Vestfjörðum varðandi verðkönnun á akstri á einkaleyfum FV.

Innanríkisráðuneyti lagði fram 6. júní 2014 umræðuskjal er varðar undirbúning reglugerða á grundvelli nýrra laga um framkvæmdarvald og stjórnsýslu ríkis í héraði og breytingu á lögreglulögum. Landshlutasamtök sveitarfélaga eiga lögum samkvæmt rétt á að skila umsögn um fyrirkomlag þessara mála innan síns landshluta. Fjórðungssamband Vestfirðinga (FV) leitaði álits aðildarsveitarfélaga sinna á framangreindu umræðuskjölum stjórn FV fjallaði síðan um málið á fundi sínum þann 26. júní sl. og gerði eftirfarandi samþykkt: "Til grundvallar verði settar fram tillögur um að aðalskrifstofa lögreglu verði á Patreksfirði og aðalskrifstofa sýslumanns verði á Ísafirði. Fjármagn verði aukið til að tryggja stöðugildi löglærðra fulltrúa á öllum sýsluskrifstofum. Að auki verði tryggt að fjármagn sé í takti við erfiða stöðu heilsárssamgangna þannig að greið samskipti (ferðalög) séu á milli starfstöðva sýslumanna og lögreglu líkt og í öðrum landshlutum."  Í umsögninni kemur einnig fram gagnrýni á málatilbúnað stjórnvalda í þessum máli þar sem heildarmynd af uppbyggingu stjórnsýslu í landshlutanum liggur ekki fyrir og ekki er tekið tillit til erfiðar stöðu heilsárssamganga á Vestfjörðum.