Fjórðungssamband Vestfirðinga krefst þess í umsögn um þingsályktun um Samgönguáætlun 2019-2023 að framlög til verkefna á Vestfjörðum verði aukin um 12 milljarða króna, frá því sem lagt er til í áætluninni.

Í dag var Áfangastaðaáætlun Vestfjarða birt formlega. Markaðsstofa Vestfjarða hefur unnið að skýrslunni undanfarin misseri og hefur skýrslan nú formlega farið fyrir sveitafélögin á svæðinu. Áfangastaðaáætlun Vestfjarða er heildstæð áætlun sem hefur ferðaþjónustu sem meginpunkt. Markmið hennar er að stuðla að ábyrgri ferðaþjónustu sem skilar sem mestu til samfélaga, um leið og mögulegum neikvæðum áhrifum er haldið í lágmarki.

Kallað er eftir umsóknum um styrki úr Uppbyggingarsjóði Vestfjarða fyrir árið 2019.  Veittir eru styrkir til atvinnuþróunar- og nýsköpunarverkefna og menningarverkefna.

Mánudaginn 15. október fá íbúar á norðanverðum Vestfjörðum tækifæri á því að sækja fundi með umhverfisstjórnunarfræðingnum Stefáni Gíslasyni. Mun hann halda tvo fundi á Ísafirði og einn fund í Bolungarvík en sá fundur er fyrir kjörna fulltrúa á svæðunum.  Í hádeginu 15. október milli kl. 12:00 og 13:00 gefst fyrirtækjum og opinberum stofnunum kostur á að senda fulltrúa sinn til að sitja súpufund á Hótel Ísafirði og hlusta á erindi Stefáns er ber heitið „Úrgangur er auðlind“. Almennur íbúafundur verður svo haldinn sama dag í sal Stjórnsýsluhúsins á Ísafirði kl. 16:30. Þar mun Stefán fjalla um sama efni og einnig koma inn á loftslagssamning Íslands og hvernig íbúar geta komið að því markmiði.

3.Haustþing Fjórðungssambands Vestfirðinga var starfsamt.Haldið var sviðsmyndaverkstæði fyrir mótun framtíðarsýnar fyrir Vestfriði en undir alvarlegri stöðu atvinnulífs og samfélaga sem komin var upp vegna sviftingar starfs og rekstarleyfa fiskeldisfyrirtækja.

Sigurður Hreinsson, varaformaður Fjórðungssambands Vestfirðinga flutti skýrslu stjórnar og ávarp formanns í fjarveru formanns, Péturs Markan, sem var erlendis.   Síðasta ár hefur einkennst af stórum baráttumálum og í raun fordæmalausum ágjöfum í þeim stóru hagsmunamálum sem Fjórðungssamband Vestfirðinga þarf að standa vörð um. Baráttan um góðar samgöngur, eðlilegan orkubúskap og uppbyggingu fiskeldis hefur verið á stundum afar erfið. Svo virðist sem almenningsálitið sé á þann veg að ekki sé talið eðlilegt að samfélög sem byggja alla sína afkomu á sjálfbærri nýtingu náttúruauðlinda geti nýtt þær. 

Hafdís Gunnarsdóttir var kjörinn formaður Fjórðungssambands Vestfirðinga á hausþingi sambandsins um síðustu helgi. 

Á haustþingi Fjórðungssambands Vestfirðinga var þessi ályktun samþykkt einróma af kjörnum fulltrúum allra sveitarfélaga á Vestfjörðum.   Örlagadagur fyrir Vestfirði og Ísland! Það er áfall fyrir Vestfirði og þjóðarbúið í heild að úrskurðarnefnd umhverfis- og auðlindamála hafi hafnað beiðni fyrirtækjanna Arnalax (Fjarðarlax) og Arctic Fish (Arctic Sea Farm) um frestun réttaráhrifa og fellt úr gildi rekstrarleyfi fyrirtækja í fullum rekstri.

Stjórn Vestfjarðastofu og ofangreind sveitarfélög  harma niðurstöðu úrskurðarnefndar umhverfis- og auðlindamála sem felldi í gær úr gildi tvö rekstrarleyfi sem Matvælastofnun veitti Fjarðarlaxi og Arctic Sea Farm til eldis á 17.500 tonnum af laxi í Patreksfirði og Tálknafirði. Ljóst er að úrskurðurinn mun hafa gríðarleg áhrif á atvinnulíf á Vestfjörðum sem og á landið í heild en gera má ráð fyrir miklu tapi á útflutningstekjum vegna úrskurðarins. Stjórnin krefst þess að stjórnvöld grípi til aðgerða til að tryggja áframhaldandi atvinnuuppbyggingu á svæðinu.

Tveir nýjir verkefnastjórar hafa tekið til starfa hjá Vestfjarðastofu og munu sinna verkefnum á sviði atvinnu- og byggðaþróunar.