Ný stjórn var kjörin hjá Fjórðungssambandi Vestfirðinga á fjórðungsþingi á Ísafirði í dag.Nýr formaður Fjórðungssambands Vestfirðinga er Pétur Markan Súðavíkurhreppi, en með honum í stjórn eru Ingibjörg Emilsdóttir Strandabyggð, Sigurður Hreinsson Ísafjarðarbæ, Margrét Jómundsdóttir Bolungarvík og Ása Dóra Finnbogadóttir í Vesturbyggð.

Miðvikudaginn 4. maí 2016 er  61. Fjórðungsþing Vestfirðinga haldið í Edinborgarsalnum á Ísafirði og að venju fjölmenna sveitarstjórnarmenn af öllum Vestfjörðum á það. Fært er um alla Vestfirði, þrátt fyrir lítilsháttar hret síðustu daga. Þingið verður með breyttu sniði þetta árið, í samræmi við nýjar samþykktir, en í framtíðinni verður ársfundur á vorin og síðan haustþing um einhver tiltekin málefni sem ákveðin eru á vorþinginu. Á þinginu á Ísafirði verða afgreiddir ársreikningar og árskýrslur og lögð fram endurskoðuð fjárhagsáætlun fyrir yfirstandandi ár. Kosið verður í stjórnir og nefndir, en kjörtímabil er tvö ár hjá Fjórðungssambandinu.

Miðvikudaginn 4. maí 2016 verður  61. Fjórðungsþing Vestfirðinga haldið í Edinborgarsalnum á Ísafirði. Þingið verður með breyttu sniði þetta árið samkvæmt samþykktum frá 60. Fjórðungsþingi sem haldið var á Patreksfirði 2. og 3. október 2015. Á þinginu verða afgreiddir reikningar og ársskýrslur og lögð verður fram endurskoðuð fjárhagsáætlun fyrir yfirstandandi ár.

Úthlutunarnefnd Uppbyggingarsjóðs Vestfjarða hefur lokið við að fara yfir umsóknir um styrki vegna ársins 2016 og stjórn Fjórðungssambands Vestfirðinga hefur staðfest tillögu nefndarinnar um úthlutun. Samtals voru rúmar 65 milljónir til úthlutunar til margvíslegra verkefna og uppbyggingar á Vestfjörðum. Mörg verkefni sem fá framlög eru sérstaklega áhugaverð og umsóknir voru fjölbreyttar. Fjórðungssamband Vestfirðinga óskar styrkhöfum til hamingju með framlögin og umsækjendum öllum góðs gengis við vinnu að sínum verkefnum. Fjármagn Uppbyggingarsjóðs Vestfjarða er hluti af samningi Fjórðungssambands Vestfirðinga við stjórnvöld um framkvæmd Sóknaráætlunar Vestfjarða 2015-2019.

Umsóknarfrestur í Uppbyggingarsjóð Vestfjarða er nú runninn út og mikill fjöldi umsókna barst á lokasprettinum. Nú tekur við úrvinnsla umsókna, en það er níu manna Úthlutunarnefnd Uppbyggingarsjóðs sem hefur það verkefni að fara yfir umsóknir og velja þau verkefni sem styrkt eru. Umsóknir eru m.a. metnar út frá samþykktum úthlutunarreglum hverju sinni, áherslum sjóðsins, markmiðum og áherslum sem fram koma í Sóknaráætlun Vestfjarða 2015-2019 og samningi milli ríkis og sveitarfélaga um Sóknaráætlun Vestfjarða 2015-2019.

Samkvæmt samþykktum Fjórðungssambands Vestfirðinga sem tóku gildi um síðastliðin áramót verða haldnir reglulegir samráðsfundir stjórnar FV og sveitarstjóra allra sveitarfélaganna níu á Vestfjörðum. Miðað er við fjóra slíka fundi á ári þar sem fulltrúar allra sveitarfélaga, stjórn og starfsmenn FV hittast. Markmið breytinganna er að auka samtalið og upplýsingaflæði milli allra sveitarfélaganna, draga úr lýðræðishalla og búa til vettvang fyrir virka þátttöku allra sveitarfélaga í starfinu milli Fjórðungsþinga. Fyrsti slíki fundurinn var haldinn á Café Riis á Hólmavík 22. janúar og mættu fulltrúar allra sveitarfélaga.

Nú styttist í umsóknarfresti til að skila inn umsóknum í Uppbyggingarsjóð Vestfjarða, en hann er til og með föstudeginum 22. janúar 2016. Uppbyggingarsjóður er innan vébanda sóknaráætlunar landshlutans og er í umsjón Fjórðungssambands Vestfirðinga. Uppbyggingarsjóður veitir styrki til menningarverkefna, atvinnuþróunar- og nýsköpunar, auk stofn- og rekstrarstyrkja til menningarstofnana. Hér má nálgast leiðbeiningar um gerð styrkumsókna til Uppbyggingarsjóðs sem unnar eru af menningarfulltrúa Vestfjarða.

Í framtíðinni verður kosið í stjórn og tvær fastanefndir Fjórðungssambandsins á tveggja ára fresti á Fjórðungsþingum Vestfirðinga, að hausti eftir sveitarstjórnarkosningar og um vorið á miðju kjörtímabili. Á síðasta Fjórðungsþingi sem haldið var á Patreksfirði í október var í fyrsta skipti kosið í úthlutunarnefnd Uppbyggingarsjóðs Vestfjarða. Stjórn og fastanefndir Fjórðungssambandsins eru annars þannig skipaðar að í stjórn eru Friðbjörg Matthíasdóttir Vesturbyggð formaður, Daníel Jakobsson Ísafjarðarbæ, Ingibjörg Emilsdóttir Strandabyggð, Sigurður Hreinsson Ísafjarðarbæ og Pétur Markan Súðavíkurhreppi (sem situr í stjórn í leyfi Baldurs Smára Einarssonar Bolungarvíkurkaupstað frá sept. 2015).

Nýjar samþykktir Fjórðungssambands Vestfirðinga sem samþykktar voru á 60. Fjórðungsþingi Vestfirðinga á Patreksfirði 2.-3. október 2015 tóku gildi nú um áramótin. Samþykktirnar eru aðgengilegar hér á vef FV undir þessum tengli. Helstu breytingar frá fyrri samþykktum eru þær að Fjórðungsþing verður hér eftir haldið að vori (í maí). Þar skal afgreiða reikninga og ársskýrslur og leggja fram endurskoðaða fjárhagsáætlun fyrir yfirstandandi ár. Málþing um tiltekin hagsmunamál sveitarfélaganna skal síðan halda að hausti (í september), en dagskrá haustþingsins skal ákveða á Fjórðungsþingi að vori. Á haustþingi er einnig lögð fram fjárhagsáætlun og starfsáætlun fyrir næsta ár.

Minnt er á að nú er í annað skipti auglýst eftir styrkumsóknum til Uppbyggingarsjóðs Vestfjarða sem rekinn er innan vébanda sóknaráætlunar landshlutans og er í umsjón Fjórðungssambands Vestfirðinga. Uppbyggingarsjóður veitir styrki til menningarverkefna, atvinnuþróunar- og nýsköpunar, auk stofn- og rekstrarstyrkja til menningarstofnana. Uppbyggingarsjóður varð til með samningi ríkis og Fjórðungssambands Vestfirðinga um Sóknaráætlun Vestfjarða 2015-2019 sem undirritaður var 10. febrúar 2015. Umsóknarfrestur er til og með föstudeginum 22. janúar 2016.