Fréttir

Á grundvelli reglugerðar nr. 643/2016 auglýsir Byggðastofnun eftir samstarfsaðilum um nýtingu aflaheimilda á Hólmavík. Um er að ræða allt að 500 þorskígildistonn fiskveiðiárið 2023/2024

Á undraverðum tíma hafa risið við Fjarðarstræti á Ísafirði Stúdentagarðar Háskólaseturs Vestfjarða. Garðarnir samanstanda af tveimur húsbyggingum sem hvor um sig er með 20 vistarverur fyrir nemendur. Fyrr í haust fluttu nemendur inn í annað húsanna en nú er hið seinna tilbúið og af því tilefni verður boðið til formlegrar opnunar föstudaginn 1. desember á milli klukkan 13:30 og 18 að Fjarðarstæti 20b (húsið sem er nær Salem). Dagskrá með ávörpum verður á milli 14 og 15. Öll velkomin!

Stjórn Byggðastofnunar hefur ákveðið að framlengja verkefnið Sterkar Strandir um eitt ár, til loka árs 2024, en Sveitarstjórn Strandabyggðar óskaði eftir framlengingunni. Tilgangurinn er að vinna áfram að þeim framfaramálum sem íbúar hafa skilgreint í verkefnisáætlun en einnig að styðja við frumkvæðisverkefni sem horfa til framfara að því marki sem kraftar verkefnisins leyfa.

Fyrsti fundur Sóknahóps Vestfjarðastofu var haldinn fimmtudaginn 16. nóvember. Hópurinn var stofnaður í maímánuði og er hann hugsaður sem samstarfsvettvangur hagaðila á sviði atvinnu- og byggðaþróunar á Vestfjörðum. Markmiðið er að efla atvinnulífið með því að stilla saman strengi og skapa sterka rödd þess í umræðunni og er varðar ákvarðanatöku til framtíðar.

Vilt þú hafa áhrif á mótun stefnu í málefnum innflytjenda? Félags- og vinnumarkaðsráðuneytið vinnur nú í fyrsta sinn að slíkri framtíðarsýn og býður því til samtals hringinn í kringum landið og verður það á Ísafirði miðvikudaginn 29. nóvember.

Umhverfis, orku og loftslagsráðuneytið tilkynnti á dögunum þau verkefni hlutu styrk úr Orkusjóði og komu fjórir styrkir til Vestfjarða að heildarupphæð 231.288.000. Þrír þeirra komu til Orkubús Vestfjarða vegna jarðhitaleitar á Ísafirði og Patreksfirði og einn til Kaldrananeshrepps vegna hitaveituvæðingar Bæjartorfunnar.

Hæfnisetur ferðaþjónustunnar og SAF boða til Menntamorguns ferðaþjónustunnar í streymi. Á fundinum verður kynning á megináherslum aðgerðaáætlunnar ferðamálastefnu til 2030. Fyrstu drög aðgerða voru nýlega birt í samráðsgátt. Áhersla fundarins verður á tillögur aðgerða sem efla hæfni og gæði í ferðaþjónustu.

Umsóknarfrestur til að skila inn umsóknum í Uppbyggingarsjóð Vestfjarða rann út 2. nóvember. Alls bárust 78 umsóknir, sem er nokkru færra en í meðalári, 48 umsóknir til menningarverkefna, 4 umsóknir um stofn- og rekstrarstyrki og 26 til atvinnuþróunar- og nýsköpunarverkefna. Alls var sótt um 117,8 milljónir króna, en heildarkostnaður verkefna er rúmlega 415 milljónir króna.

Íbúakönnun landshlutanna er nú í fullum gangi. Könnunin er á vegum Byggðastofnunar, landshlutasamtakanna og atvinnuþróunarfélaga og er hún ætluð öllum íbúum á Íslandi sem náð hafa 18 ára aldri. Tilgangur hennar er að kanna hug íbúa til búsetuskilyrða, aðstæðna á vinnumarkaði og afstöðu til annarra mikilvægra atriða.

Athugið að fundinum hefur verið frestað vegna tafa á flugsamgöngum. Nýr fundartími auglýstur síðar. Embætti ríkissáttasemjara verður með spjallfund á Ísafirði mánudaginn 27. nóvember á milli klukkan 14 og 15:30. Fundurinn verður haldinn í húsnæði Vestfjarðastofu að Suðurgötu 12.