Hvað er samfélagsleg nýsköpun? Við leitumst við að svara því á fundi á Teams þann 12. júní kl. 12.

Nú fer fram þjónustukönnun Byggðastofnunar meðal íbúa á landsbyggðinni á því hvert og hversu oft þeir sækja margvíslega þjónustu. Út frá sjónarmiði byggðamála og landshlutanna er þátttaka í þessari könnun mjög mikilvæg svo skilgreina megi þjónustusvæði og fá mynd af viðhorfum íbúa mismunandi svæða til breytinga á þjónustu. Áætlað er að það taki um 10 mínútur að svara könnuninni sem er á íslensku, ensku og pólsku.

Í dag er síðasti dagur maímánaðar og við fögnum honum með fréttabréfi Vestfjarðastofu. Það er óhætt að segja að mánuðurinn hafi verið annasamur á Vestfjarðastofu þar sem nú er í fullum gangi vinna við gerð svæðisskipulags fyrir Vestfirði og Sóknaráætlunar Vestfjarða 2025-2029 til viðbótar við allt annað sem þar er þegar verið að vinna.

Ársfundur fulltrúaráðs Vestfjarðastofu 2024.

Í gær hélt Vestfjarðastofa íbúafund í félagsheimilinu á Patreksfirði undir yfirskriftinni Framtíð Vestfjarða – þér er boðið að borðinu. Það var breiður hópur fólks víðsvegar af sunnanverðum Vestfjörðum sem sótti fundinn og fór þar fram kraftmikil vinna fundargesta sem mættu með bjartsýnina að vopni.

Á dögunum var styrkjum úthlutað til atvinnumála kvenna og voru tvær vestfirskar konur á meðal styrkþega. 33 verkefni hlutu styrk að þessu sinni. Þeirra á meðal var ræktun lífrænnar burnirótar á norðanverðum Vestfjörðum sem Harpa Lind Kristjánsdóttir stendur að og markaðsetning tilbúinna matvæla úr þangi sem Jamie Lee hjá Fine Foods Islandica vinnur að.

Í næstu viku verða haldnir íbúafundir um alla Vestfirði þar sem heimafólki er boðið að borðinu til að hafa áhrif á gerð svæðisskipulags fyrir Vestfirði og Sóknaráætlun Vestfjarða 2025-2029. Með því að mæta og taka þátt getur fólk haft sitt að segja um hvað fer inn í áætlanir og er okkur sem komum að vinnunni það mikið í mun að íbúar sjálfir upplifi eignarhald yfir þeim.

Barnamenningarhátíðin Púkinn steig aftur fram á vordögum og fór fram dagana 15. -26. apríl. Eftir fyrsta Púkann, sem var haldinn í september 2023, kom fram að betur færi á halda hátíðina að vori. Því var ákveðið að halda aðra hátíð strax vorið 2024, en hún yrði smærri í sniðum. Fyrsta hátíðin var styrkt af Barnamenningarsjóði en þessi sem nú fór fram af Sóknaráætlun Vestfjarða. Hátíðin var því haldin tvisvar á þessu skólaári, en hefur nú vonandi fundið sinn stað á dagatalinu og verður haldin aftur vorið 2025.

Í gær funduðu ferðaþjónar á Vestfjarðaleiðinni um lengingu ferðatímabilsins á Vestfjörðum með áherslu á vetrarferðaþjónustu. Fundurinn var vel sóttur, en yfir tuttugu ferðaþjónustuaðilar frá Vestfjörðum og úr Dölum mættu til leiks í Flókalund þar sem fundurinn fór fram.

Ferðamálastofa og Íslenski ferðaklasinn bjóða til ráðstefnu með metnaðarfullri dagskrá um nýsköpun og fjárfestingar í ferðaþjónustu. Viðburðurinn er hluti af nýsköpunarvikunni 2024. Við skorum á alla sem tengjast ferðaþjónustu með einum eða öðrum hætti að mæta.